Milampos paghikog sa ikaduhang higayon

CEBU, Philippines - Usa ka lalaking napakyas kaniadto sa paghikog subling naghikog ug ning higayona milampos kini gamit ang pisi nga iyang gihikot sa iyang liog diha sa ilang balay sa barangay Pagsabongan sa dakbayan sa Mandaue kagahapon sa kaadlawon.

Ang nagpakamatay mao si Luis Fernandez, 46, residente sa maong dapit kinsa napalgan sa iyang igsuong si Alma nga nagbitay na ug wala nay kinabuhi.

Sumala pa sa imbestigasyon sa kapolisan ang igsuon ni Luis nga si Alma mibutyag nga niadtong milabay’ng tuig miinom og muriatic acid ang igsuon apan ilaha kining natabang ug nasalbar.

Ang kapolisan walay nakitang foul play sa kamatayon ni Luis apan ila pa gihapon kining ipaubos sa awtopsiya aron masuta kung unsay hinungdan sa kamatayon niini.   - (BANAT NEWS)