NIA may relocation site

CEBU, Philippines - Ang kagamhanan sa lalawigan sa Sugbo andam nga mohatag og relocation site sa buhatan sa National Irrigation Authority (NIA) tungod sa pagsugot nila sa awhag ni Governor Gwendolyn Garcia sa pagpabiya kanila sa giukopan nilang luna sa barangay Banilad ning siyudad sa Sugbo .

Sumala pa sa gobernador nga iyang gipasaligan ang mga opisyales sa NIA nga hatagan sila og usa ka relocation site aron katukoran nila og opisina.

Ang maong pasalig gihimo sa gobernador   ngadto kang Diosdado Rosales , usa ka opisyal sa NIA kinsa nakighinabi kang gobernador Garcia didto sa Kapitolyo sa miaging adlaw.

Matud pa ni Garcia nga iyang ipagamit ang 1,000 metro kwadrado nga luna sa probinsiya nga nahimutang sa sitio Sudlon, barangay Lahug, siyudad sa Sugbo.

Si Rosales nagpasalamat sa gobernadora tungod sa gitanyag nga lote niini aron kabalhinan sa ilang buhatan.

Giangkon ni Rosales nga naglisod gyud sila sa pagpangita og laing luna nga balhinan sa ilang buhatan hinungdan nga midangop na usab sila sa buhatan sa goberndora.

Kini tungod kay ang lote nga giukopahan karon sa NIA gamiton sa kagamhanan sa lalawigan sa Sugbo alang sa dugang kaugmaran   sa nahisgutang lugar .   - (BANAT NEWS)