Presidente sa Tanzania miduaw sa Kapitolyo

CEBU, Philippines - Mibisita dinhi sa Sugbo ang kanhi presidente sa Tanzania Benjamin Mkapa, kinsa   maoy pangulo   karon sa South Centre Board Organization uban sa mga Board Members sa nahisgotang organisasyon ug miduaw kang Gobernador Gwendolyn Garcia   sa iyang buhatan sa miaging adlaw.

Si Mkapa ug kaubanan   motambong sa ika-27 nga South Centre Board Meeting nga ipahigayon dinhi sa lalawigan.

Si Vice Governor Agnes Magpale ug mga sakop sa Hunta Probinsyal maoy misugat ni Mkapa ug mga kaubanan sa ilang pag-abot sa Kapitolyo.

Atol sa ilang panagtagbo ni Gobernador Garcia gipadangat sa kanhi presidente ngadto sa gobernador ang iyang kinasingkasing nga pasalamat ug ang pahalipay sa kasaulogan sa probinsiya sa 442nd Founding Anniversary.

Gibutyag ni Mkapa nga   usa sa   nahisgutan nila ug sa gobernador mao ang malampuson kaayong programa sa tubig   sa lalawigan.

Dugang pa ni Mkapa nga ang   tanan niyang nasayran nga malampusong programa sa gobernador iyang hisgutan sa tigom nila aron ipasagop usab kini sa mga lugar nga nakasinati usab  og mga krisis sama sa lalawigan sa Sugbo.   - (BANAT NEWS)