CEBU, Philippines - Gitulis sa duha ka armadong lalaking nagsakay og motorsiklo ang usa ka messenger nga padulong mo-deposito og kuwarta sa bangko kagahapon sa alas 10:40 sa buntag diha sa dalan El Flores Tupas St., sa barangay Pasil siyudad sa Sugbu.
Si Arnold Egorola, taga Pasil nagdala og kwarta nga P350 mil padulong mo-deposito sa BPI Manalili branch kagahapon sa buntag samtang nagsakay og biseklita sa dihang kalit kining gitulis.
Matud niya nga samtang nagdulhog na siya sa taytayan sa maong lugar kalit siyang gisikitan paingon sa daplin sa karsada sa duha ka wala mailhing lalaking nagsakay og motorsiklo nga pulos nagsul-ob og helmet ug ang angkas mibunot og kalibre .45 nga pistola ug gition kaniya dayong deklarar og hold-up.
Misuway unta siya og sukol apan nakuha gyud sa mga tulisan ang maong bag. Si Egorola sa pakighinabi sa Banat News nagkanayon nga daw nakaila siya sa drayber sa motorsiklo kay dili kini makaharong og tan-aw kaniya.
“Nagtion nako nag-helmet pero maklaro ang ilang nawong. Nagduda ko sa drayber nga murag kaila nako kay dili moharong og tan-aw,” matud pang Egorola.
Si Egorola gisugo sa pagdeposito sa bangko sa kagawad sa barangay Pasil nga si Julius Guio-guio kinsa negosyante og isda diha sa Pasil Fishport.
Si Guio-guio nga nahinabi sa Banat News nagkanayon nga P200 mil ang iyang kuwarta nga gipadala sa biktima samtang P150 mil sab ang gipadala ni Kapitan Jocelyn Almacin aron ibayad sa ilang supplier sa isda nga taga Mindanao.
Siya mitataw nga sa pagkakarun wala pa siya’y pagduda sanglit kinse na ka tuig nila nga messenger si Egorola. Nagduda hinuon siyang kaila ra nila ang mga tulisan.
Ang kapulisan sa Carbon ug San Nicolas Police Station ingon man ang Theft and Robbery Section (TRS) sa Cebu City Police Office (CCPO) nagtinabangay na karon sa pagkuha og dugang impormasyon aron mailhan ang duha ka tulisan. - (BANAT NEWS)