Remnants sa kuratong nadakpan

CEBU, Philippines - Tulo ka lalaking gidudahang gun for hires ug sakop sa Ozamis robbery group nga Kuratong Baleleng ang nadakpan sa Provincial Intelligence Branch (PIB) sa Cebu Provincial Police Office (CPPO) atol sa gilusad nga pagpangronda kagahapon sa alas-4 pasado sa kaadlawon sa giabangan nilang balay sa sitio Mahayahay sa barangay Bangkal sa dakbayan sa Lapulapu.

Ang mga sakop sa PIB mi-serve unta sa Warrant of arrest tungod sa kasong murder batok sa usa sa ilang mga kauban nga maoy giingong miyembro sa Ozamis robbery group ug maoy nag-abang sa gipuy-ang balay apan nakaikyas sa maong operasyon.

Nadakpan hinuon ang manag-agaw’ng giila lang nga sila si Nelson ug Harold pulos nag-edad og 24, lumad nga taga Poblacion lungsod sa Mahayag sa Zamboanga del Sur ug Eldie, 24, nga taga Molave, Zamboanga del Sur.

Si Nelson nakuhaan og usa ka .45 nga kalibre sa armas nga may buhing mga bala sulod sa magazine ug hand grenade, samtang .45 nga kalibre ang nakuha usab kang Harold ug .38 revolver ang kang Eldie ingon man upat ka paketeng shabu.

Si Sr. Supt. Patrocino Comendador, director sa CPPO nagkanayon nga ang pagkasikop sa tulo konektado sa operasyon niadtong Martes sa hapon sa barangay Dakit sa dakbayan sa Bogo.

Kini dihang usa ka Arman Tipon-tipon ang ilang nadakpan sa buy-bust operation ug nakuhaag mga shabu. Matud ni Comendador nga ang tulo mga gaway sa kaniadto Kuratong Baleleng.

“Initially motira ni sa among area, dako ni nga criminal activities, basin tulis ni kay dili i-discount basin mga gun for hire ni sila,” matud pa ni Comendador.

Wala hinuon moklaro si Comendador kung usa o duha niini ilang nadakpan posibling maoy ni-ambush patay sa negusyanteng si Antonio Ouano sa miaging duha ka semana diha sa dakbayan sa Mandaue.

Matud ni Comendador ang nakaikyas kauban kini sa usa ka pamilyahang gimasaker niadtong miaging bulan diha sa dakbayan sa Lapulapu nga giingong sakop sa Kuratong Baleleng Gang.

Ang tulo sa dihang gikuhaan og pamahayag sa mga sakop sa media hugtanong mihimakak sa pasangil.   - (BANAT NEWS)