CEBU, Philippines - Tulo sa siyam ka mga barko sa Trans-Asia Shipping Lines Inc. nga gisuspenso sa pagbiyahe ang gikatakdang mobalik na sa paglawig human ma-clear sa inspeksyon sa Maritime Industry Authority (MARINA).
Kini samtang ang tagdumala, mga opisyal ug crew sa maong kompanya mihangyo sa Marina nga i-reset ang hearing karong Agosto 15 labot sa pagkalunod sa ilang barkong MV Asia-Malaysia sa Iloilo niadtong milabay’ng semana.
Sa ex parte motion nga gipasaka kagahapon sa buntag si Judge Bashiruddin Adel, ug abogado sa Trans Asia nga si Dexter Viñan miingon nga hatagan sila og napulo ka adlaw aron kompletuhon ang ilang mga dokumento.
“The Honorable Authority requires respondent to submit voluminous records and documents. The foregoing circumstances behoove the undersigned to seek the graciousness of the Honorable Authority and that respondents be given 10 days from today within which to file answer and the hearing scheduled on August 5 be cancelled and reset to August 15,” matud pa ni Viñan sa ilang pamahayag diha sa korte.
Ang hearing may labot sa gipangayong eksplinasyon nganong di i-revoke ang Certificate of Public Convenience (CPC) sa maong kompanya tungod sa kalapasan sa maritime rules and regulations. Hinuon si Adel mitugot sa gipangayong extension apan wala tuguti sa Marina ang hangyong wagtangon na ang suspension sa tanang barko niini.
Si Viñan nagkanayon nga base sa Republic Act 9295 kon Domestic Shipping Development Act una pa ipatuman ang suspension aduna pa untay hearing nga gihimo.
Si Marina information officer Jose Cabatingan nagkanayon nga ang suspension gibase sa Memorandum Circular 143, nga gilatid sa International Safety Management Code.
Hinuon matud pang Cabatingan nga gilibkas na ang suspension sa MV Trans Asia 3, MV Trans Asia Indonesia ug MV Trans Asia 5. - (BANAT NEWS)