Anak giluba'g botelya sa amahan

CEBU, Philippines - Samaron ang usa ka ulitawo human kini dunggaba og buak nga botelya sa iyang amahan didto sa sitio Calubihan sa barangay Marigondon, dakbayan sa Lapulapu   sa miaging buntag.

Ang biktima mao si Jojo Sagarino, 20, ulitawo ug ang suspetsado usab mao ang iyang amahan nga si Raul Sagarino, 42, nga pulos nagpuyo sa maong dapit.

Si PO3 Allan Pantaleon sa homicide section sa kapolisan sa maong dakbayan miingon nga gikan pa   sa inom ang suspetsado ug hubog na kini nga nahiuli sa ilang balay.

Sa pag-abot sa ilang balay, iyang gisugo ang biktima, apan wala usab dayon motuman ang naulahi hinungdan nga nasuko ang suspetsado ug nagkalalis ang duha. Dihang miinit ang panaglalis sa amahan ug anak, ang nahauna    kinsa init kaayo og ulo gumikan sa kalasbag mikuha   og basiyo sa bino dayong pospos   niini sa yuta.

Unya ang dapit sa liog sa botelya nga buak maoy gikuptan sa suspetsado ug gihansak kini  ngadto sa tiyan sa iyang anak. Dali nga gidala ang biktima ngadto sa Lapulapu City Hospital apan gibalhin kini   ngadto sa Vicente Sotto Memorial Medical Center sa dakbayan sa Sugbo. Si PO3 Pataleon miingon nga ang suspetsado kinsa nadakpan dayon nila kasamtangang gibalhog sa ilang detention cell.   - (BANAT NEWS)