Shootout sa Carreta usa patay

CEBU, Philippines - Patay ang usa ka 21-anyos nga giingong sakop sa Crips Gang human kini pusila sa giingong sakop sa karibal nga grupong Bloods diha sa barangay Carreta ning dakbayan kagahapon sa hapon.

Ang namatay giilang si Eleuterio Ellacone Jr. residente sa maong barangay samtang ang suspek nga mipusil kaniya giilang si Elmer Colongan, 31, usa ka scrap metal buyer ug sakop sa Bloods gang.

Si Colongan nalandig usab sa Cebu City Medical Center human mapusili sa mirespondeng polis nga si PO2 Alex Buanghog nga residente sa maong dapit.

Sumala pa ni PO3 Geoffrey Gutual sa Homicide Section nga gikahinabi sa Banat News sa ilang imbestigasyon nasuta nga ang biktima diha sa gymnasium nianang tungura dihang miabot ang suspek kauban ang wala mailhing lalaki luwan sa usa ka motorsiklo.

Gikatahong naggara-gara ang suspek pag-ibot ibot og armas atubangan sa biktima ug nag-apir-apir pa sa biktima ug nagkinataw-anay human niini milakaw ang biktima.

Apan kalit kining gipusil sa suspek, bisan samaron midagan si Ellacone paggawas apan gigukod kini sa suspek ug giusban og pusil hinungdan sa pagkahapla niini sa agianan.

Natunong usab nga nakabantay si PO2 Buanghog ug daling miresponde ug napusilan si Colongan sa dughan. Si Colongan daling gidala sa Cebu City Medical Center. Nakuha sa crime scene ang tulo ka basiyo sa kalibre .45 ug narekober usab ang gigamit nga kalibre .45 nga pistola ni Colongan nga may sulod nga upat ka buhing bala nga ang usa diha pa sa chamber niini. - (BANAT NEWS)