Tulisan gidemalas

CEBU, Philippines - Usa ka gikatahapang sakop sa robbery gang ug gun for hire ang nadakpan sa kapolisan human kini manulis sa miaging tungang gabii diha sa dalan Hernan Cortes sa barangay Subangdaku, dakbayan sa Mandaue.

Nasakmit sa kapolisan ang kalibre .45 uban sa mga bala, ug pitaka nga gipanag-iya sa biktima ni Michael Ancero, 29, taga barangay Malingin, dakbayan sa Bogo ug igsoon ni Dindo Ancero nga suspetsado usab kaniadto sa pagtulis sa bangko sa dakbayan sa Bogo sa miaging tuig.

Ang dinakpan giingong usa sa tulo ka wala hiilhing lalaki nga mitulis nila ni Cheryl Saberano, 22, ug Ramonito Bansalan, 39, nga usa ka habal-habal drayber.

Si Sr. Insp. Frank Oriol, hepe sa Presinto 2 sa Subangdaku Police Station sa Mandaue City Poilice Office miingon nga si Ancero ug duha ka kaubang lalaking luwan sa motorsiklo mitulis sa mga biktima ug mikuha sa pitaka ni Bansalan nga adunay P400.

Dihang nadunggan ni Bansalan nga sila pamusilon gipabulhot niini ang iyang motor hinungdan sa pagkatagak ni Saberano kinsa dali usab nga mibarog ug midagan padulong sa Presinto 2.

Kuyog si Bansalan gipahigayon ang hot pursuit operation hangtod nga ilang nasigpatan si Ancero sa dalan A.S. Fortuna sa sitio Orel sa barangay Banilad nga positibong gitumbok sa biktima hinungdan nga ilang nadakpan.

Atol sa pagrekisa kang Ancero nakuha kaniya ang maong pistola, usa ka paketeng shabu ug ang pitaka ni Bansalan nga adunay P400.

Gimando na usab ni Supt. James Goforth, ang pagpa-ballistics exam ang armas ni Ancero pagsuta kun nagamit ba kini sa ubang krimen sama sa pagpatay kang Antonio Ouano.  - BANAT NEWS