Dul-an 20 mil punoan sa marijuana nalarot

CEBU, Philippines - Gironda kagahapon sa kaadlawon sa mga sakop sa Regional Public Safety Battalion (RPSB) ang marijuana plantation diha sa sitio Busay, barangay Patong ug sitio Butong sa barangay Basiao parehong mga bukirang barangay sa lungsod sa Badian.

Ang RPSB pinangulohan nila ni Inspector Roland Alizier ug Inspector Ryan Jay Orapa ang gikatahong nakalarot og sobra sa 18,000 ka mga punoan sa marijuana. Si Alizier mibutyag nga gibana-banang 15 ngadto sa 20 kilometros ang ilang gilakaw gikan sa utlanan sa Badian ug Dalaguete ug matag maagian nilang tinanom nga marijuana ilang gipanglarot.

Ang sakop sa RPSB naabot sa lugar mga alas 2:00 sa kaadlawon apan gisugdan nila ang pagpanglarot alas 4:00 na sa kaadlawon, wala sad silay nadakpang nagtanom niini.

Sa oras niining pagbalita ang kapolisan padayon pang nag-ihap sa mga nalarot nilang marijuana ug ang uban ilaha na lang gidauban ngadto sa lugar diin nila kini nalarot tungod sa kabug-at na sa ilang pagdala ug lisod ug dangog ang agianan tungod sa uwan ug kusog usab nga hangin.  - BANAT NEWS