Kanhi polis gipatay

CEBU, Philippines - Gipusil ug namatay sulod sa tambalanan ang usa ka kanhi pulis human kini gipusil makadaghang higayon sa usa ka wala mailhing lalaki kagahapon sa alas-10:20 sa buntag diha sa Cogon Drive sa barangay Cogon-Pardo siyudad sa Sugbu.

Si Raul Guinita Sebrero,55, na-dismiss sa serbisyo sa Philippine National Police (PNP) tungod sa kasong Absence Without Official Leave (AWOL) ug katapusang nadestino sa Talisay City Police Station nakabsan sa iyang kinabuhi sulod sa Cebu City Medical Center (CCMC) alas 10:50 human nahiagom og tulo ka samad pinusilan.

Sa pasiunang pakisusi nila ni SPO4 Rey Cuyos, PO3 Wetzel Berry, sa Homicide Section sa Cebu City Police Office (CCPO) ang biktima nahiagom og duha ka samad pinusilan sa iyang ulo ug usa sa dughan.

Usa ka lalaking nagsul-ob og jacket, ug nag-helmet ug sakay og motorsiklo maoy gitumbok nga mamumuno.

Si Berry sa pakighinabi niini sa Banat News nagkanayon nga nag-atang nang daan ang killer kinsa nagpasumangil pang mopalit og sigarilyo sa usa ka tindahan apan sa paglabay sa biktima gipusil dayun ang naulahi ug dihang natumba gitiwasan kini sa ulo.

Ang lalaki misakay sa motorsiklo ug misibat palayo sa lugar, patay pag-abot sa tambalan ang biktima.

Laing nakuhang impormasyon sa kapulisan nga sa wala pa mahitabo ang pagpusil sa biktima iyang nakit-an ang duha (killer ug biktima) nga nag-estoryahanay.

Matud pa nga gibiyaan sa biktima ang maong lalaki ug wala madugay milanog dayon ang sipang buto sa armas ug taud-taod niana ang maong kaestorya sa biktima gikatahong mipakatap og estoryang may tawong gipusil ug nagdali kining mibiya.

Ang mga kabanay sa biktima wala pa mohatag og pamahayag ngadto sa kapulisan sa posibleng motibo sa nahitabo ni Sebrero.  - BANAT NEWS