Pagpasibog kang Saavedra isip testigo gisupak

CEBU, Philippines - Gipasibog sa kampo ni anhing vice governor Greg Sanchez ang testimonya sa negosyante nga si Crisologo Saavedra sa padayong gipaminaw nga kasong administratiba batok kang Gobernador Gwendolyn Garcia sa buhatan sa Department of Interior and Local Government (DILG).

Kini ang gipadayag sa bag-ong abogado sa kihante nga si manlalaban Joseph Randy Torregoza ngadto sa hearing officer sa DILG   dihang gisugdan na usab ang marathon hearing niadtong unang adlaw sa Agosto ang kaso batok sa gobernador.

Ang maong lakang kusganong gisupak sa lead counsel sa depensa og anak ni Governor Garcia nga si manlalaban Ma. Cristina Garcia Frasco sanglit nasayud man sila nga walay mga basihanan ang paglangkat kang Saavedra isip unang testigo sa kihante kay nahuman naman ang direct examination niini ug nasugdan na ang ilang pag-cross examine kang Saavedra.

Matud pa sa abogado sa depensa nga ang pagtangtang kang Saavedra isip testigo sa kihante usa ka dakong kalapasan sa tawhanong katungod sa gireklamo nga si Gobernador Garcia kun tugotan sa DILG ang tinguha sa kampo sa kanhi bise gobernador aron  lamang mahunong ang pagpresentar ni Saavedra isip witness bisan kun nagpadayon pa ang cross examination sa depensa kaniya.

Hinuon nasabutan sa duha ka kampo nga iheklin lamang una ang nahisgutang isyu kay gusto man sa DILG nga makapagawas dayon sila og recommendation sa maong kaso sulod niining semanaha pinaagi sa pagpaminaw sa uban pang mga testigos.  - BANAT NEWS