Duha ka suspetsadong NPA nadakpan

CEBU, Philippines - Duha ka gidudahang sakop sa rebelding New Peoples Army (NPA) ang nasikop sa kasundalohan human sa engkuwentro didto sa sitio Malig-on sa barangay Bandila, lungsod sa Toboso, Negros Occidental, kagahapon sa alas 7:30 sa buntag.

Si Lt. Col. Christopher Tampus, tigpamaba sa Central Command nga nahinabi sa mga tigbalita miila sa duha ka dinakpan nga mao sila si Bienvenido Pacatang, 45, taga sitio Bansila, Toboso ug Antonio, 56, Damalirio sa mao gihapong lungsod.

Si Tampus nagkanayon nga nahitabo ang engkwentro tali sa First Scout Ranger Batallion 3rd company nga gipangulohan ni Lt. Frank Bailon ug sa gibana-banang 30 ka mga rebeldeng NPA samtang   nagpahigayon og combat operation sa maong lugar ang kapin sa usa ka gatos ka sundawo.

Hinuon walay nasamdan sa habig sa mga sundawo ug sa rebeldeng NPA apan nasakmit sa kasundalohan ang usa ka M16 armalite rifle, mga backpack ug supersibong dokumento sa mga rebelde didto sa encounter site.

Matud ni Tampus nga gipailawom dayon sa tactical interrogation ang mga dinakpan.

“We believed ilang lider ang dating pari nga si Father Francisco Fernandez nga naila nga Father Frank nga maoy pinakadako sa Negros Occidental”.

Si Tampus nangayo na og helicopter nga UHIH aron sakyan sa duha ka dinakpan paingon sa Toboso aron ila kining ika-turn over ngadto sa Philippine National Police (PNP) alang sa pagpasaka og kaso subay sa rules of engagement nga ilang gisunod.

Matud ni Tampus nga ila karong gitutokan pag-ayo ang lugar sa Negros island kay base sa ilang nakuhang impormasyon nagpadayon didto ang extortion activity sa mga gidudahang sakop sa NPA ngadto sa mga negosyante ug ingon man sa mga asendero og tubo.

Si Tampus mitataw nga nagpadayon ang ilang pakig-alayon sa PNP nga motabang sila sa pagpaniid sa mga airport, seaport ug pakig-alayon sa mga guwardya sa mga dagkong establisamento aron dili sila malutsan sa mga teroristang grupo nga nagplanong mohimo og kagubot sa bisan asang lugar dinhi sa Visayas region lakip na ang Central Visayas.  - BANAT NEWS