Senador Miguel Zubiri mi-resign

CEBU, Philippines - Nahugyaw kagahapon sa hapon ang Senado human mo-resign si Senador Juan Miguel Zubiri   base sa gipasakang election protest batok kaniya ni Manlalaban Aquilino “Koko” Pimentel III.

Apan ang maong pasangil gihimakak ni Zubiri ug base sa report sa ABS-CBN News sa tipik sa privilege speech ni Zubiri siya nagkanayon nga “ I am resigning because these unfounded accusations against me, and this issue has systematically divided our nation and has cast doubts in our electoral system which have affected not only myself, this institution but the public as well” nga gipaminaw sa mga suod niyang higala nga mitambong sa sesyon sa Senado kagahapon sa hapon.

Kahinumdoman nga si Pimentel misang-at og election protest batok kang Zubiri ug ang maong reklamo nagpabilin gihapon karon sa Senate Electoral Tribunal.

Si Zubiri kinsa maoy mipuno sa ika-12 nga lingkuranan sa Senado gipasanginlan nga nanikas niadtong eleksiyon sa tuig 2007.

Ang mga bag-ong saksi batok kang Zubiri mao ang nasuspensong Gobernador sa Autonomous Region in Muslim Mindanao (ARMM) nga si Zaldy Ampatuan ug si kanhi Maguindanao election supervisor nga si Lintang Bedol.

Ang duha nagkanayon nga gimandoan sila sa Malacañang nga pun-an ang boto ni Zubiri niadtong eleksiyon sa 2007.

Si Ampatuan kinsa maoy suspetsado nga utok sa Maguindanao massacre mibutyag usab nga gimanduan siyang pakuhaan ang mga boto nila ni Panfilo Lacson, Noynoy Aquino ug Alan Peter Cayetano.

Ang tulo pulos ubos sa ticket sa oposisyon.

Si Zubiri kinsa ubos sa ticket sa administrasyon midaog sa milabay’ng eleksiyon og 21,000 botos ang iyang labaw kang Pimentel kinsa usa ka oposisyon.

Si Pimentel sa iyang bahin, sa interview niini sa ANC nagkanayon nga nadismaya siya sa gipanulti ni Zubiri kinsa miingon nga walay igong basehanan ang pasangil nga midaog siya sa tikas sa eleksiyon niadtong 2007.

Matud ni Pimentel nga adunay mga ebidensiya ang iyang reklamo batok kang Zubiri ug gani adunay gibuksan nga mga ballot boxes ug nasuta nga mga peke ang sulod niining mga balota nga gikan sa Maguindanao.

Si Pimentel nagkanayon usab nga si Ampatuan mitug-an kung giunsa nila pagmaniobra ang mga balota ug maingon man si Bedol miluwat usab kini og affidavit kalabot sa maong panikas. Gawas sa duha, may   lain pang tulo ka mga municipal election supervisor nga miluwat usab og affidavit kabahin sa nahitabong tikas sa eleksiyon niadtong 2007.

Si Pimentel nagkanayon nga ang maong election protest niya dili matawag nga baseless o walay basehanan tungod kay aduna silay mga ebidensiya.

“It’s also significant that he resigned, it’s a rare act but I am also hoping that he was doing it for right reason”, ni Pimentel pa.  - BANAT NEWS