Gikawat nga vault gilabay sa Consolacion

CEBU, Philippines - Gikawat nga vault gikan sa usa ka auto parts store sa barangay Basak, dakbayan sa Lapulapu napalgan nga gilabay sa kasagbotan sa barangay Tayud, lungsod sa Consolacion.

Si Senior Inspector Wilbert Parilla, hepe sa kapolisan sa maong lungsod nga nahinabi sa Banat News miingon nga usa ka tawo sa barangay Tayud sa nahisgotang lungsod nga sayo sa buntag nga nanugway sa iyang baka maoy nakakaplag sa vault nga gilabay sa kasagbotan.

Dugang pa niya ang maong vault adunay sulod nga mga tseke sa Allied Bank sa dalan Colon sa dakbayan sa Sugbo nga gipanag-iya sa usa ka Henry Tiu.

Gawas niini duna pay nahabilin nga mga ubang dokumento sama sa calling cards sa Kasaligan Auto Mart.

Nagduda ang kapolisan nga adunay dakong kantidad ang maong vault tungod sa mga lastikong nakit-an diha sa sulod nga sagad gamiton paghikot sa binandol nga kuwarta.

 Sumala pa nga alas 4:00 sa kaadlawon nakamatikod ang nakakaplag sa maong vault nga may milabay sa ilang balay nga usa ka multicab nga dunay pipila ka mga tawong sakay ug nihunong sa maong lugar ug nitambog sa maong vault.

Sumala pa nga gituohang gidukdok og maayo ang maong vault hangtud nga naablihan.

 Matud pa ni Parilla nga ilang gihatod ang nahisgutang vault ug mga tseke sa nahisgotang bangko ug nakumpirmar nila nga si Henry Tiu mao gyud ang nanag-iya niini.  

Si Tiu maoy tag-iya sa Kasaligan Auto Parts sa barangay Basak, dakbayan sa Lapulapu.

Si Tiu miasoy sa buhatan sa Theft and Robbery Section (TRS) sa Lapulapu City Police Office (LLCPO) nga ilang nadiskubrehan nga biktima sa pagpangawat ang ilang tindahan dihang mangabli na unta sila alas 8 pasado ang takna kagahapon sa buntag.

Sa pagpakisusi sa Banat News sa TRS gikatahong ang mga kawatan diha misulod sa gilungkab nga pultahan sa maong tindahan.

Wala pa hinuon modeklarar si Tiu kung pila ang nadalang kuwarta sa sulod sa maong vault nga gilabay sa Tayud, Consolacion.

Nahanaw usab ang mga post dated nga mga tseke nga giingong nagdala og dakong kantidad nga gikatakda nga ibayad ngadto sa ilang suki sa mga pisa sa sakyanan nga ilang gibaligya. - Romeo T. Limpangog ug Darrel Carumba/EIM (BANAT NEWS)