Molupyo sa Sam-Ang sa Lorega mireklamo

CEBU, Philippines - Gipatumang kausaban sa kasabutan tali sa dakbayan ug sa mga residente sa karaang sam-ang sa barangay Lorega-San Miguel ning dakbayan wala mauyuni sa mga tawo.

Ang mga sakop sa United Cemetery Side Residence Association Inc. (UCSRAI) pinangulohan ni Evangeline Abejo nasagmuyo sa pag-usab sa ilang nasabutan nga “rent to own” ang pagatukorong socialized housing project sa siyudad sa ilang dapit.

Apan nakugang na lang sila gumikan kay giusab kini ug gihimo ra kining paabangan ug hangtud sa hangtud dili gyud nila maangkon ang balay nga papuy-an kanila.

Ang usa sa mga residente sa maong dapit nga si Pablo Cabagi misaysay ngadto sa sakop sa mga media nga luoy kaayo ang ilang kahimtang sa maong kabag-ohan gumikan kay wala’y kasiguroan ang ilang pagpuyo.

Gisupak usab niini ang planong ang Non-Governmental Organization nga Gawad Kalinga maoy modumala sa maong socialized housing project tungod kay gusto nilang direkta sa gobiyerno ang mohupot niini.

“Dili mi uyon, luoy kaayo among kahimtang diha busa gusto namo nga i-review ang kasabotan namo sa una. Among nahibaw-an kay rent to own unya karon nahibaw-an na lang namo nga mag-abang ra diay mi permi sa unit. Moabot gyud mi og 300 kapin ka pamilya nga nagpuyo diha,” matud pa ni Cabagi.

Mibisita kagahapon ang pipila ka   mga residente sa Lorega sa Division for the Welfare of Urban Poor (DWUP) ug gitun-an na karon sa maong departamento ang posibleng himuon nilang aksyon.

Gisuwayan og kontak sa Banat News ang buhatan sa Gawad Kalinga apan dili kini makontak.  - BANAT NEWS