Hubog nga nagbiseklita patay sa traysikol

CEBU, Philippines - Patay ang usa ka lalaking nagsakay sa iyang biseklita human gikabangga niini ang gikasugat nga traysikol diha sa barangay road sa barangay Yati sa lungsod sa Liloan niadtong Domingo alas 9:40 sa gabii.

Si SPO1Claudio Castro Jr., nadistino sa traffic sa Liloan Police station sa pakighinabi niini sa Banat News miila sa biktima nga mao si Jaime Cabahug Arcite, 40, residente sa Villa Rina Bag-ong dan sa barangay Yati.

Samtang ang drayber nga nakadasmag kaniya giila nga mao si Wilson Pepito Magdadaro, 37, nagpuyo sa sitio Silot sa barangay Yati.

Matud ni Castro nga gikan sa eskina Yati si Magdadaro ug paingon sa Tayud apan pag-abot sa gamay nga dulhogon nga bahin sa maong lugar iyang gikasugat ug gikabangga ang biktima.

Si Arcite nga giingong nakainom niadtong higayona ug maayong pagkalagpot sa sementadong karsada ug nakaangkon kini og grabeng kadaut sa iyang kalawasan lakip na sa ulo.

Daling gihatud ang biktima sa Vicente Sotto Memorial Medical Center (VSMMC) sa dakbayan sa Sugbu apan matud pang Castro niadtong Lunes sa alas-9 sa buntag gipahibawo siya sa igsuon sa biktima nga si Delia nga nakabsan sa kinabuhi ang biktima sulod sa tambalanan.

“Si Delia nakadawat og text gikan sa nagbantay sa pasyente nga nakabsan sa kinabuhi ang biktima thru sa attending physician sa VSMMC,” matud pang Castro.

Ang drayber nga si Magdadaro boluntaryong mitahan sa kaugalingon sa kapulisan human sa hitabo apan gibuhian niadtong Lunes sa buntag human nagkasinabot ang tag-iya sa traysikol ug kabanay sa biktima nga maoy mobayad sa tanang galastuhan sa biktima.  - BANAT NEWS