Bohol himuong national tourist destination

CEBU, Philippines - Ang probinsiya sa Bohol gustong himuong National Tourist Destination ni Presidente Benigno Simeon Aquino III ug misaad sa pagsuporta sa tanang pangayuon sa taga Bohol alang niini.

Kini iyang gipadayag atol sa iyang speech sa iyang pagbisita ngadto sa probinsiya sa Bohol kagahapon.

Mga alas 11:00 sa buntag kagahapon si Aquino mitambong sa oathtaking sa mga sakop sa Regional Peace and Order Council sa dakbayan sa Tagbilaran diin human sa unom ka tuig nga pagpangulo gipasa ni Gobernadora Gwendolyn Garcia kang Bohol Gov. Edgardo Chatto ang renda sa maong konseho.

Gikan sa Tagbilaran ang presidente milahos kini ngadto sa lungsod sa Trinidad, Bohol alang sa inugurasyon sa bag-ong gitukod nga munisipyo sa lungsod nga gisugdan og tukod niadtong Marso, 2010 ug natapos niadtong Hulyo 2011 sa kantidad nga P28 milyones.

Sa 20-minutong speech ni Aquino atubangan sa 6,000 ka mga tawong mitambong misaad kining ang tanang pangayuon sa taga Bohol iyahang ihatag.

Matud usab sa presidente nga gusto niyang mahimong national tourist destination sa nasud ang probinsiya sa Bohol ug may plano siyang mabutangan kini og tugpahanan sa lungsod sa Panglao.

Kagahapon gibutyag usab ni Aquino nga sa milabay’ng administrasyon 72 ka roll-on-roll-off (RORO) ports ang girekomendar nga tukoron diha sa Bohol apan ubos sa iyang administrasyon ang Department of Transportation and Communication (DOTC) nga si Mar Roxas misusi niini diin nasuta nga unom lang ang pwedeng mabutangan og RORO ports sa Bohol.

Sa unom ka RORO ports nga tukoron ang gobiyerno makadaginot og P25 bilyones nga sobra pa aron makapatukod og airport sa Panglao tungod kay P8 bilyones lang makapatukod na og tugpahanan. (BANAT NEWS)