Tiggamitan og tubig sa Alegria ipa-imbentaryo

CEBU, Philippines - Gi-obligar sa kagamhanan sa lungsod sa Alegria ang tanang nanag-iya ug tagdumala sa pribado ug pampublikong water system   sa maong lungsod nga boluntaryong mo-imbentaryo ug molista sa gidaghanon ug ngalan sa ilang mga suki.

Mao kini unod sa   usa ka resolusyon nga gipasar sa konseho sa lungsod nga nag-obligar na sa tanang tagduma og water system nga ihapon nila kun pila na ka balay ang ilang tagsa-tagsa nga nahimong suki.

Gikonpirmar kini ni Mayor Amilita Guisadio sa Alegria nga na-pending pa karon sa konseho ang maong resolusyon, ubos sa pagdumala ni Bise Mayor Marcial Rodriquez Jr., nga maoy presiding officer sa konseho.

Usa sa tumong niini   mao nga aron ma-monitor   kun haing serbisyoha sa tubig ang dili luwas imnon sa mga suki niini. Nasayran nga sa milabay’ng semana mikuyanap ang sakit nga tipos sa maong lungsod ug hangtod karon wala pa masuta kun haing serbisyoha sa tubig, sa pribado bang waterwork system o sa publiko   ang kagawon ug dili luwas imnon sa katawhan.

Ang nagrabihan pag-ayo mao ang barangay Valencia   ug Madredijos diin mikabat sa 200 ka mga pasyente ang nalandig sa Badian District Hospital.

Nasayran nga ang water system nga nag-supply og tubig sa kabalayan sa   Valencia maoy usa sa gitumbok sa mga residente nga nakapatipos kanila. Kun maimbentaryo na ang nanag-supply og tubig sa lungsod nga may kompletong listahan sa ilang mga suki, sayon nalang kaayo ang pagtumbok sa angay pasanginlan sa hinungdan sa unsa mang sakit. (BANAT NEWS)