Tungod sa biseklita, usa gipatay

CEBU, Philippines - Namatay diha-diha ang usa ka construction worker human kini pusila sa iyang silingan gumikan   lang sa gihuwaman nga bisikleta didto sa Sitio Pokang, barangay Looc dakbayan sa Mandaue sa milabay’ng gabii.

Ang biktima mao si Rey Ybanez, 29, ulitawo, residente sa maong dapit, ug usa ka construction worker, samtang ang suspetsadong mipatay kaniya mao si Wilfredo Bucog, hingkod, nga silingan sa biktima.

Sa pasiunang imbestigasyon sa kapolisan sa Station.5 sa Mandaue City Police Office (MCPO) nasuta gikan kang Amparo Ybanez, inahan sa biktima nga   sa wala pa ang hitabo, ang iyang usa ka anak nga si Rey mikuha sa bisekleta ni Bucog nga walay pananghid ug gidala kini sa Barangay Cambaro apan wala na kini ikauli ngadto kang Bucog hinungdan sa panagbikil sa suspetsado ug sa biktima.

 Unya mga alas 7:30 sa milabay’ng gabii, may tawo nga mitawag sa biktima sa gawas sa ilang balay ug sa paggawas sa naulahi gipusil dayon kini.

Pagtan-aw sa inahan nahagba na ang biktima sa yuta nga naligo sa kaugalingon niyang dugo samtang ang lawas may mga samad sa bala sa armas de fuego ug wala nay kinabuhi.

Unya nakita ni Alex Ontal, ang barangay tanod nga silingan sa biktima, nga si Bucog   midagan pahilayo gikan sa balay sa biktima   nga may dalang bag. (BANAT NEWS)