Sedoripa mobiya na sa CCMC

CEBU, Philippines - Nagsugod na kagahapon ang indefinite leave ni Dr. Eduardo Sedoripa, ang hepe sa Cebu City Medical Center kinsa naglaraw nga molarga ngadto sa Canada uban sa iyang pamilya karong buwana busa hingpit na niyang biyaan ang iyang katungdanan sa CCMC.

Si Sedoripa nagsugod sa pag-alagad sa CCMC niadtong Enero ning tuiga ug usa sa maisip niyang kalampusan mao ang paghiusa sa nagkadaiyang departamento nga wala nagkasinabtanay kaniadto.

 Matud pa niya nga iyang gihusay ang maong suliran sa mga kawani  sa CCMC tungod kay maoy makalangay sa serbisyo ang dili nila pagsinabtanay sa usa’g- usa.

Siya usab ang nagpasiugda sa programa   sa pagbutang og botika sulod sa hospital nga may kompletong supply sa tambal.

 Ning iyang pagbiya sa tambalanan iyang gipanghinaot nga ipadayon sa mopuli kaniya ang nasugdan na niyang maayong programa sa CCMC

Matud pa niya   nga ang iyang paglarga ngadto sa   Canada   maoy pagtuman sa iyang gisaad   sa iyang pamilya.

Samtang gipahibalo ni Mayor Michael Rama kagahapon nga ang head sa internal medicine department sa CCMC nga si Dr. Gloria Duterte maoy mobarog nga officer-in-charge sa CCMC.

Suma pa niya Rama nga iyang respitohon ang desisyon ni Sedoripa sa pagbiya niini sa CCMC ug nagpasalamat siya sa maayong nahimo niini sa   CCMC.   - (BANAT NEWS)