Wa mopatuo sa pasidaan gi-ambush patay

CEBU, Philippines - Usa ka lalaking gipasidan-ang dili modayon og pauli tungod sa peligro apan wala mopatuo sa tambag ang gipusil patay samtang naglakaw padulong sa ilang balay sa bukirang barangay sa lungsod sa Alegria niadtong Domingo sa gabii.

Gipusil patay sa wala mailhing tawo diha sa sitio Sayaw sa barangay Valencia si Cipriano Guardiario, 38, taga sitio Larawan sa naasoy’ng barangay.

Si Guardiario nga kargador nahiagom og tulo ka samad pinusilan sa tuong dughan, tuong agtang ug paa nga napalgan sa kasagbotan tulo ka metros ang distansya gikan sa dalan.

Si Sr. Insp. Daniel Comision, hepe sa Alegria Police Station sa pakighinabi niini sa telepono sa Banat News nagkanayon nga gikan pa nakigsabot ang biktima sa usa ka komprador og repolyo nga si Felix Rivas.

Tungod kay nakainom na giingong gipasidan-an kini sa tag-iya sa tindahan nga giila lang sa pangalan nga Nita nga di nalang mouli tungod kay lawom na ang kagabhion ug duna nay insidenteng ang nag-inom sa ilaha gipusil sa pagpauli.

“Didto sa tindahan daghan na ang nangatulog tungod sa previous incidents nga naay gipusil, murag alarming na ba,” matud pang Comision.

Apan wala kini mopatuo ug igo lang nakalakaw og 200 metros gikan sa tindahan nadunggan dayon ang lima ngadto sa siyam ka sunod-sunod nga buto sa armas.

Matud ni Comision nga base sa ilang imbestigasyon nakadagan pa ang biktima bisan kun naigo na apan nahagba gyud kini. Walay nakuhang mga kabhang sa bala sa crime scene.

Usa sa gisubay karun sa kapulisan nga tulis ang motibo tungod kay posibleng nagtuo ang mga kriminal nga aduna kini dakong kwarta kay nakig-kontrata kini og mangomprahay og repolyo apan nasutang wala diay kini mahinayon.   - (BANAT NEWS)