Taxi driver supak sa Ciudad Project

CEBU, Philippines - Gikabalak-an sa mga drayber sa taxi nga siguradong mohuot gyud pag-ayo ang mga sakyanan sa karsada sa Banilad kun matukod na ang Ciudad Project sa Kapitolyo.

Ang kabalaka gipadayag ni Jammy Llanos, ang presidente sa Bantay Taxi Association kinsa nagkanayon   nga mahiagom gyud sa kalangay ang biyahe sa mga sakyanan sa maong lugar nga makahatag og kahasol sa mga motorista ug sa mga sumasakay.

Ang Ciudad Project, nga gigahinan og P1.2 bilyones dugay nang gilaraw sa kagamhanan sa lalawigan sa Sugbo sa pagpanguna   ni Gobernador Gwendolyn Garcia nga tukoron sa 2.8 ka ektarya nga luna sa tunga nga bahin sa Governor Cuenco Avenue ug Asiatown I.T Park sa Banilad.

Matud pa ni Llanos nga kun mahitabo kana, apektado ang ilang panginabuhi.

Hinuon si Laurencio Bihon, usa usab sa mga drayber sa taxi nagkanayon nga nag-ampo siya nga dyutay nalang unta nga taxi ang mobiyahe sa maong lugar aron siya nalay maghakot-hakot sa mga sumasakay og taxi sa maong dapit ug siguro siyang mokita og dako.

Si Llanos susama og baroganan ni Kongresista Tomas Osmeña sa habagatang distrito sa dakbayan sa Sugbo kinsa dakong supak nga matukod ang Ciudad Project.

Hinuon ang ubang mga drayber miingon nga unya na sila mohatag sa ilang hunahuna  kun mahuman na ang maong proyekto ug nangandoy usab sila nga maayo unta kun dyutay nalang silang mga taxi nga mosulod didto aron mabuhi sila. 

Nasayran nga ang developer sa maong proyekto   nga mao ang Fifth Avenue Development Corporation mipasalig   nga labing makatabang sa pagpalambo sa turismo ang Ciudad Project sanglit ang desinyo niini susama og dagway sa karaang mga edipisyo sa karaang panahon nga kompleto usab sa department store, kan-anan ug  museum.

Apan gawas niini si Gobernador Garcia nagkanayon nga dako kaayo kini og ikatabanag sa unemployment problem sa kagamhanan sa Sugbo nga usa ka butang nga   wala kahimut-i ni Osmeña.  - BANAT NEWS