Tabunan ipaubos sa curfew

CEBU, Philippines - Ang Barangay Tabunan , usa ka bukirang barangay sa Siyudad sa Sugbo moduso sa ilang giumol nga curfew ordinance alang sa mga menor de edad sa ilang dapit.

Kini ang gibutyag ni Kapitan Lucresia Gabato sa maong barangay kinsa nagkanayon nga ang tumong niini mao ang pagprotiher sa seguridad sa mga batan-on sa ilang lugar.

Miingon si Gabato nga mibati sila og kabalaka kay bisan tungang gabii ang mga batan-on sa ilang barangay anaa lang gihapon sa kadalanan maglaroy-laroy nga delikado kaayo sa nagkalainlaing krimen nga mahitabo busa miumol ang konseho sa barangay sa Ordinance No. 2.

 Sa Barangay Ordinance No. 2 gidid-an ang mga batan-on nga nagpangidaron og 17 paubos nga mogawas sa ilang balay kung walay pagtugot sa ilang mga ginikanan sugod na sa alas 10 sa gabii hangtod sa alas 4:00 sa kaadlawon sa sunod adlaw.

Kung adunay importanteng lakaw ang usa ka batan-on mas maayo nga kuyogan kini sa mga ginikanan aron mabantayan gyud ang ilang seguridad.

Kung maaprobahan ang maong ordinansa, makamulta og P100 ang molapas niini.

Hinuon ipaubos pa sa pag-review ang maong Barangay Ordinance sa Cebu City Council Committee on laws and ordinance nga gipangulohan ni Konsehal Edgardo Labella.  - BANAT NEWS