Gipatay tungod sa utlanan sa balay

CEBU, Philippines - Patay ang usa ka mamuhatay og chicharon human kini gitusak-tusak og kutsilyo sa iyang silingan tungod sa away nilang duha sa utlanan sa ilang mga balay niadtong Sabado sa hapon diha sa sitio Mananga 2, barangay Tabunok, dakbayan sa Talisay.

Ang biktima mao si Silverio Paquera, residente sa maong dapit kinsa nakaangkon og mga samad dinunggaban sa iyang lawas daling gidala ngadto sa Talisay City District Hospital apan wala na kini makaabot nga buhi sa maong tambalanan.

Ang suspetsado mao si Jonathan “Atan” Tapao, residente usab sa lugar ang nakaikyas dihang gigukod kini nila ni PO3 Mikie Espina, PO2 Stephen Sefuesca ug PO1 Euwen Pitogo.

Base sa imbestigasyon giingong dugay nang nagkabangi ang duha sa utlanan sa ilang mga balay. Ang duha parehong mga informal settlers diha sa lugar.

Si Paquera giingong misulti ngadto kang Tapao nga dili itapad sa iyang balay ang tukoron niining balay tungod kay halos dili na unya sila makapangluwa nga maoy hinungdan sa ilang lalis.

Pila ka minuto ang milabay mga alas 5:45 sa hapon dihang si Paquero diha sulod sa ilang balay nag-andam og panihapon si Tapao kalit misulod ug sa walay pangutana gihansakan si Paquero.

Human sa maong insidente si Tapao daling mibiya sa balay ni Paquero. Ang gwardiya sa TCDH mao nay mitawag sa kapolisan ug mi-report sa insidente dihang si Paquero nalandig sa maong tambalanan.

Gipahigayon ang hot-pursuit operation batok ni Tapao kinsa ilang naabtan diha sa suba sa Mananga 2 nga miubog sa sapa tabok sa pikas tampi ug nakahimo sa pag-ikyas.  - BANAT NEWS