Barko Nalunod

CEBU, Philippines - Dul-an 200 ka pasahero ug mga tripulante ang na-rescue gikan sa nagtakilid ug dayon nalunod nga M/V Asia Malaysia sa Trans Asia Shipping Lines Inc. kagahapon sa buntag sa kalawran sa isla sa Calabasas, lungsod sa Ajuy gibana-banang 87 ka kilometro gikan sa Iloilo City.

Ang commander sa Philippine Coast Guard-Western Visayas nga si Commodore Athelo Ybañez nga ang maong barko adunay 178 ka mga pasahero ug 44 ang mga tripulante.

Ang mga Bantay Dagat diha sa lugar mitabang sa pagluwas sa mga pasahero ug gipabalhin sa mipaduol dayong M/V Filipinas Cebu sa Cokaliong Shipping nga gikan usab sa Sugbu.

Ang M/V Filipinas Cebu naglawig kini gikan sa pwerto sa dakbayan sa Sugbo usa ka oras human ang M/V Asia Malaysia makabiya.

Ang 42 ka mga pasahero nga na-rescue sa M/V Filipinas Cebu gidala kini ngadto sa pwerto sa Iloilo mga alas 10:30 sa buntag kagahapon.

Samtang 33 ka mga tawo lakip na ang kapitan sa barko ang gidala ngadto sa pwerto sa Culasi sa Ajuy samtang ang 103 ka pasahero pito niini mga tripulante na-rescue sa LCT, Philippine Visayas ug gidala ngadto sa Bacolod City.

Si Ybañez mibutyag nga base sa iyang nadawat nga report ang M/V Asia Malaysia gikuso-kuso og kusog nga hangin hinungdan nga mitakilid ngadto sa 35 degrees sa tuo(starboard side) ug nangabugto ang kable sa mga karga niini maong wala na makabawi sa wala.

Alas 5:00 sa buntag ang kapitan matud pang Ybañez mimando nga i–abandonar na ang barko ug usa ka oras ang milabay gikan sa paglutaw-lutaw naagian kini sa ubang mga barko ug mitabang sa mga pasahero.

Ang M/V Asia Malaysia mibiya sa pwerto sa Sugbo mga alas 6:00 sa gabii niadtong Sabado ug gikatakda untang modunggo sa Iloilo mga alas 8:00 sa buntag kagahapon.

Ang tagdumala sa Trans-Asia Shipping Lines, Inc. sa gipadalang pamahayag dinhi sa Banat News nagkanayon nga ang M/V Asia Malaysia gi-clear sa Philippine Coast Guard nga alas 6:00 sa gabii niadtong Hulyo 30, 2011 paingon sa Iloilo.

Giklaro sa tagdumala nga dili overloaded ang barko sa pasahero ug kargamento apan alas 4:00 sa kaadlawon kagahapon gikuso-kuso og kusog nga hangin ug dagkong bawod hinungdan nga mitakilid kini.

Alang sa kaluwasan sa mga pasahero ang kapitan daling mipahibawo ngadto sa PCG ug mipadala dayon og distress signal ug mimando sa pagpabalhin sa mga pasahero ngadto sa M/V Filipinas Cebu ug ngadto sa laing barko nga LCT, Phil. Visayas.

Ang mga Emergency Response Team ug mga personnel ang gipang-deploy ug miatiman sa mga gikinahanglan sa mga pasahero sa pag-abot nila ngadto sa pwerto sa Iloilo City . - Uban sa report ni Brenda D. Batuto/EIM (BANAT NEWS)