5 nanuyop og shabu tiklo

CEBU, Philippines - Lima ka construction worker   kinsa nasakpan sa akto nga nanuyop og shabu gisikop sa kapolisan   sa dakbayan sa Naga didto sa Sitio Mojon, barangay Langtad, sa maong dakbayan    sa miaging hapon.

Ang mga nasikop mao sila si Victorino Election, 29 , minyo, Melvin Lawas, 40, minyo, Al bacus, 24 , ulitawo, kinsa pulos taga barangay Villadolid, dakbayan sa Carcar, Jeffrey Aliviado, 31, minyo, nga taga Perrelos, Carcar ug Randy Aliviado, 38, minyo, nga taga barangay Sangat, San Fernando.

Si PO1 Rongie Nadora, desk officer sa Naga City Police Station mibutyag sa Banat News nga nakadawat og impormasyon   kalabot sa pagpanuyop og shabu sa maong mga trabahante sa konstruksyon sa usa ka payag sa maong lugar.

Busa sila si PO3 Francisco Codinera ug mga kaubanan misuta dayon sa maong   balita ug sa pag-abot nila didto nasakpan gyud sa akto ang maong mga construction worker nga nag-iyahay og suyop og shabu.

Ang wala kaikyas nga mga suspetsado nasakmitan usab og unom ka mga gagmay’ng pakite sa gituohang shabu uban sa 7 ka mga kinumot nga tin foil ug   usa ka lighter.

Ang upat gibalhug dayon sa prisohan samtang gihikay na ang kasong ipasaka batok nila. Gidugang ni PO1 Nadora nga ang lugar   nga gisuyopan sa mga dinakpan gitumbok nga usa ka drug den, diin mapusili si PO2   Antonio Ecalina   sa miaging   buwan. (BANAT NEWS)