CEBU, Philippines - Tulo ka mga babaye kinsa nagpakita sa ilang mga dughan atubangan sa web cam samtang nakig-chat sa ilang mga kliyente sa private room sa usa ka internetan sa barangay Tabunok, dakbayan sa Talisay , naluwas sa kapolisan nga mironda sa maong establisemento niadtong Biyernes sa hapon.
Si Chief Inspector Eddie Recamara, officer-in-charge sa Talisay City Police Station sa pakighinabi sa Banat News mibutyag nga naaktohan nila ang nahisgutang tulo ka babaye sa private room sa Level-up Internet Café sa Tabunok nga nagpakita sa ilang dughan atubangan sa web cam samtang dunay ka chat.
Nasayran gikan kang Recamara nga usa sa mga babaye mibutyag nga matag sesyon bayaran siya og $100 sa usa ka langyaw nga iyang kliyente. Ang tulo ka babaye gipaubos sa kustodiya sa Women and Children Protection Desk sa kapolisan sa Talisay.
Si Erwin Mercado, 42-, taga Victoria Village, Tabunok nga maoy tag-iya sa nahisgotang internetan ug ang attendant niining si Clifford Caballero, 31, taga Tabunok gihapon temporaryong nagkagulkol karon sa TCPS.
Matud ni Recamara nga kalapasan sa balaod ang pagbutang og private room sa internetan tungod kay makapaaghat kini sa tawo ilabi na sa mga babaye nga mag-cybersex.
Hinuon matud pa ni Recamara nga mopahigayon pa sila og lawom nga imbestigasyon pagpiho kung si Mercado aduna bay kalambigitan sa mga gibuhat sa nahisgutang tulo ka babaye.
Ug kun masuta sa kapolisan nga aduna siyay kalapasan posibleng mapasakaan kini og kasong paglapas sa Akta Republika 9208 kon“ anti-trafficking in person’s act”.
Giimbargo sa kapolisan gikan sa internetan ni Mercado ang siyam ka Central Processing Unit (CPU), siyam ka keyboard, siyam ka web cam nga dunay microphone, siyam ka mouse, lima ka LRT monitor, siyam ka headset, upat ka LCD monitor, upat ka serial port VGA cable, 18 ka power cord wires ug upat ka mga kurtina nga light blue ang mga kolor.
Dugang ni Recamara nga susihon nila kung aduna bay ordinansa ang siyudad batok sa mga private room sa internet café aron nga kapasakaan usab nila og kasong kalapasan sa ordinansa ang nahisgutang tag-iya sa maong establisamento. (WC) (BANAT NEWS)