CEBU, Philippines - Istriktong gimonitor sa Sangguniang Kabataan (SK) Federation sa dakbayan ang mga programa sa opisyales sa SK sa nagkadaiyang barangay kung gigamit pa niini ang 10% nga budget nila alang sa Green Brigade alang sa pagprotektar sa kalikupan. Aminado si SKF president John Philip Po nga dunay mga SK officials ang dili pa kaayo lapad ang gibuhat nga programa sa kalikupan sanglit bag-o pa lang sila sa ilang mga posisyon apan iya silang gipahimangnoan nga moaktibo sa maong programa.
“Bisan gani ang saktong paglabay sa basura , nakatabang na ta og maayo ana sa environment,” matud pa ni Po .
Dugang pa niya nga usa pud ron sa gihingusgan sa SKF ang pagtabang sa kampanya sa siyudad sa saktong pagbahig sa basura ngadto sa malata ug dili malata.
Ang mga programa sa SK maoy usa sa mga tukion sa umaabot nga Cebu City Youth Congress sa siyudad sa sunod bulan. - (BANAT NEWS)