Sari-sari store festival gilusad

CEBU, Philippines - Gilusad kagahapon ang tinuig nga Prince Warehouse Club Sari-Sari Store (SSS) Festival 2011 sa Exhibition Hall sa Cebu International Convention Center (CICC) sa dakbayan sa Mandaue   nga gitambongan sa mga suki sa Prince Warehouse Club (PWC).

Si Rhea Janice Go, chief operations officer (COO) sa PWC mibutyag sa mga tigbalita nga mao kini ang ika-unom ka tuig sa pagpahigayon nila niining SSS festival sa PWC ug mapasalamaton kaayo sila sa tanan nilang mga suki.

Ang PWC may lima ka sangang tindahan nga nahimutang sa North Reclamation Area sa dakbayan sa Mandaue, sa dakbayan sa Danao, dakbayan sa Sugbo dapit sa Cebu City Hall, sa lungsod sa Minglanilla ug sa Baybay, Leyte.

Si Go mibutyag nga sa umaabot nga Septembre 12, 2011 laing sangang tindahan sa PWC ang ablihan didto sa dakbayan sa Maasin, probinsiya usab sa Leyte.

Gibutyag niya nga ang PWC adunay “Sari-Sari Store Society” kon kahugpongan sa “SSS” nga mga tag-iya og sari-sari store diin gihatag nga libre alang niadtong gustong mga pamiyembro, apan pabayron og P60 alang sa membership card.

Kadtong may membership card, may punto silang balig P1 sa matag P100 nga balor sa mga baligya nga ilang komprahon gikan sa tindahan sa PWC.

Kun dinaghan ang komprahon sa membro, dagko usab kaayo sila og puntos   nga mahimong kapailisan nila og cash o kaha ibali nila og kompra og mga tinda sa tindahan sa PWC .

Sa lima ka mga sangang tindahan sa PWC gibana-banang mokabat usab og 12,000 ngadto sa 15,000 ang mga membro sa SSS society niini apan matud ni Go   nga mga 2,000 lamang ang aktibo niini karon.

Gibutyag ni Go nga usa sa ilang mga kalihokan niining PWC festival mga raffle diin may mga giandam nga mga dagkong ganti nga mga grocery   ug ubang produkto nga madawat sa mga suwertihong mananaog.

Unya gawas sa raffle, moseminar usab sila sa ilang mga suki sa tukmang paagi sa accounting , inventory ug pagdumala sa ilang sari-sari store.

Apan ang usa ka dakong butang nga kapahimuslan sa mga membro sa SSS society mao ang ilang “Micro Finance Program” o “Pangpuno-Puhonan sa Prince”.

Kini pinaagi sa pagpahuwam nila og puhonan ngadto sa ilang mga suki   nga nagpadagan og sari-sari store.

Sa mga aplikante, ang tagdumala sa PWC magpadala og credit officer ngadto sa ilang nahimutangan aron sutaon kun tinuod bang may sari-sari store sila ug sutaon usab kun pilay angayang ipahuwam kanilang puhonan.

Hinuon dili cash ang ipahuwam kanila kundi, mag-agad sa itugot nga kantidad nga ipahuwam kanila, apan mga baligya nga gikan sa tindahan sa PWC   ang ihatag kanila   aron masiguro nga ikatinda usab nila kini sa ilang sari-sari store nga pabayran kanila sulod sa usa ka buwan sa barato kaayong tubo.

Ang kalihukan kagahapon natapos sa alas 5:00 sa hapon gikan sa alas 9:00 sa buntag   nga gipadasig pinaagi sa . mga kompaniya sa Nestle, Uniliver ug International Pharmaceutical Incorporated (IPI) ug sa The Freeman. - (BANAT NEWS)