Scam ipa-imbistigar sa NBI
CEBU, Philippines - Giduso sa Bureau of Customs (BOC) ngadto sa mga tinugyanan sa National Bureau of Investigation (NBI) 7 ang pag-imbestigar niining scam sa internet nga usa sa matang sa pangilad sa pagpatuo sa usa ka ilaronon nga may “package’ siyang dawatonon nga gipaagi sa Customs Sub-Port of Mactan.
Si Deputy Collector for Operations Francis Agustin Ahmed Erpe mibutyag nga iyang gihimo kining maong lakang gumikan sa kadaghan nang mga nabiktima kinsa miduol kanila ug mangutana ug nagsusi sa package nga ilang dawatonon gikan sa gawas sa nasud.
Unya inigsusi nila sa ilang listahan, wala diay butang nga gipadala sa biktima gikan sa gawas, sukwahi sa gipahibawo sa iyang informer pinaagi sa internet bahin sa dawatonon niyang butang.
Ang kolektor sa Sub-Port of Mactan Paul Alcazaren mibutyag nga niadtong bulan sa Pebrero unom ka mga reklamo ang iyang nadawat gikan sa mga biktima nga miduol kaniya ug nagsusi sa kargamento niini nga gikan sa gawas sa nasud.
Ang maong mga biktima naggikan sa Cavite, Subic, Leyte, Zamboanga, Metro Manila ug dinhi sa Sugbo.
Matud pa ni Alcazaren nga segun sa gibutyag sa mga biktima nga nakig-chat kuno kanila ang mangingilad nga magpaila nga taga- gawas sa nasud. Unya sa dihang nagkasuod na sila, mipasalig kining mopadala og mga package o parcel nga kunohay sukipan og dakong kantidad sa salaping dolyar.
Unya mipasalig nga dili mangayo og bayad gawas sa gitawag nga processing fee, bayranan sa buhis nga 400- 600 ka dolyar unya nangayo pa og dugang 1,500 ka dolyar sa maong mga butang nga mao konuhay ang ilang kobrahon sa biktima.
Unya human makabayad ang biktima kanila, tagalan sila og adlaw aron ipakuha ang maong butang sa United Forwarder Inc. nga nagbase sa sitio Matumbo, barangay Pusok sa dakbayan sa Lapulapu.
Apan kalit lang nalusno sa kaguol ang biktima inigkasayod nga way package nga nadawat ang maong forwarder alang sa biktima.
Sa pagkakaron gitun-an sa taga NBI unsaon pagsumpo kining mga binuang sa scam.(WC) - (BANAT NEWS)
- Latest
- Trending
