Lola nadasmagan angol

CEBU, Philippines - Talandugon ang kahimtang sa usa ka 57 anyos nga lola human kini dasmagi sa multicab nga pasaheroan didto sa barangay Tuyan siyudad sa Naga sa miaging udto.

Ang biktima mao si Rosita Repollo, 57, minyo ug molupyo sa nahisgutang lugar.

Samtang ang nakadasmag mao ang multicab nga nagbiyahian sa Carcar - Cebu City nga rota nga gimaniho ni Arnel Encabo, 33, minyo, nga taga barangay Inoboran sa maong  dakbayan.

Si PO1 Rongie Nadora, desk officer sa Naga City Police mibutyag sa   Banat News   nga ang multicab nagpaingon sa siyudad sa Sugbo dihang pag-abot sa maong lugar mikalit og tabok sa karsada ang biktima busa nadasmagan sa iyang sakyanan. Ang biktima nga nakaangkon og mga pangos ug bun-og sa kalawasan human malamba sa semento daling gihatud   ngadto sa South General Hospital sa Naga.

Samtang ang drayber sa multicab mitahan dayon sa iyang kaugalingon   ngadto sa mga polis nga mirespondi sa alarma ug nagtingkagol na karon sa karsel samtang nagpaabot sa tukmang sumbong nga ipasaka batok kaniya. - (BANAT NEWS)