TF Ouano blanko gihapon

CEBU, Philippines - Nagpabilin pa gihapong blangko ang kapolisan sa Mandaue City Police Office (MCPO) pag-ila sa mga killers sa magpapatigayong gibanhigan patay niadtong miaging semana.

Usa ka giingong gun for hire nga gipasanginlang nakapusil patay sa usa ka sakop sa kapolisan nga nadestino sa Regional Mobile Group (RMG) 7 didto sa Balamban nga ilang nadakpan ang gisusi karon sa kapolisan.

Si Dwight Rosario Carmelotes, 26, nga taga lungsod sa Balamban, Cebu ang gidakop sa panimalay niini sa barangay Cubacub sa dakbayan sa Mandaue niadtong miaging adlaw.

Si SPO2 Cesar Climaco sa Balamban Police Station nga nahinabi sa Banat News miingon nga si Carmelotes maoy suspetsado sa pagpusil patay kang PO1 Ramil Taping niadtong Marso niining tuiga.

Si Supt. James Goforth nga maoy pangulo sa Task Force Ouano mipakita sa mga saksi sa pagbanhig patay kang Antonio Ouano kang Carmelotes apan giingong wala kini ilha.

Lakip sa miabag karon sa pagsulbad sa kamatayon ni Ouano mao ang tanang kuwerpo sa kapolisan sa Sugbo nga naglakip na sa Cebu City Police Office, National Bureau of Investigation (NBI), kapolisan sa dakbayan sa Lapulapu ug uban pa.

Si Goforth miingon nga ilang gituohan nga mga professional gun for hire ang mga responsable sa pagpusil patay kang Ouano ug ang mga anggulo sa negosyo ug personal nga kaaway maoy ilang gituohang maoy hinungdan niini. (EIM) - (BANAT NEWS)