Mga balay sa Lilo-an gipanglungkab

CEBU, Philippines - Nawad-an sa ilang salapi ug mahalon nga mga butang ang duha ka pamilya human lungkaba ang ilang mga balay diha sa barangay Yati sa lungsod sa Lilo-an sa miaging kadlawon atol sa pagbunok sa kusog nga uwan.

Si SPO2 Ernesto Pepito sa Lilo-an Police Station nga nahinabi sa Banat News miila sa mga biktima sa pagpanglungkab nga mao sila si Junrey Cantero, 27 anyos ug Cherry Bacalla Velasquez, 36, pulos nagpuyo sa maong dapit.

Matud pa ni SPO2 Pepito nga si Cantero nakuhaan sa iyang usa ka Neo Yamaha motorcycle nga nagkantidad og P70,000 , Toshiba laptop, P45,000, I-pod nga P8,000 ang kantidad ug kwarta nga P8,000.

Ang ikaduhang biktima nga si Velasquez nakuhaan sa iyang Samsung Television nga 46 inches nagkantidad og P40,000 ug silver necklace nga P9,000 ang kantidad.

Si SPO2 Pepito miingon nga giatol sa mga kawatan ang paglungkab sa panimalay sa mga biktima dihang kusog kaayong bunok sa ulan ug nahinanok sa pagkatulog ang mga tagbalay.

Si SPO2 Claudio Castro sa Lilo-an Police Station mibutyag sa Banat News nga usa sa problema nila karon ang sunod-sunod nga insidente sa kawat diha sa kabarangayan sa lungsod nga sikbit usab nga barangay sa lungsod sa Consolacion.

Dugang pa niya nga gihimo na nilang pagpasiugda og mga checkpoint sa pipila ka mga dapit sa ilang lungsod apan ang mga polis usab ang gibantayan sa maong grupo sa mga kawatan. (BANAT NEWS)