Polis mi-AWOL gipa-blotter

CEBU, Philippines - Usa ka polis nga nadestino sa Tabuelan Police Station gipa-blotter sa hepe niini tungod kay usa ka bulan kining mi-AWOL ug wala usab mananghid nga mo-absent

Ang hepe sa Tabuelan Police Station nga si Police/Insp. Emmanuel Masong miila sa maong polis nga si PO2 Rusty Ong kinsa mipalta sa trabaho gikan niadtong Hunyo 26, 2011 hangtod ning pagbalita ug wala usab hisayri kun unsay hinungdan sa iyang pagpalta.

Si PO2 Ong , 30, minyo ug taga barangay Singko, sa lungsod sa Tuburan, niadto pang miaging Mayo madestino sa Tabuelan gikan sa iyang destino sa Isla sa Camotes.

Si PO2 Gilbert Allego, desk officer sa Tabuelan Police Station mibutyag sa Banat News nga gipadad-an sa ilang hepe og suwat si PO2 Ong nga gihatod pa og mga polis ngadto   sa ilang balay sa Tuburan apan igo lang gidawat ang suwat, wala gyud kini mopatim-aw sa iyang destino.

Matud ni PO2 Allego nga wala silay namatikdan kang PO2 Ong nga may problema ug wala usab kini gikasungi nga kauban niya sa trabaho sa ilang buhatan. Si PO2 Ong didto madestino   sa Tabuelan Wharf   apan gibiyaan kini sa maong polis nga wala magpahibawo sa iyang hepe ug kaubanan.

Nunot niini gideklarar ni Insp. Masong si PO2 Ong nga Absent Without Official Leave kon AWOL ug miduso na kini og report ngadto kang Sr/Supt. Patrocinio Comendador ang hepe sa Cebu Police Provincial Office (CPPO) alang sa tukmang lakang. (BANAT NEWS)