Polis seminaron bahin sa cybersex

CEBU, Philippines - Ipailawom sa training ug seminar ang kapolisan dinhi sa Central Visayas bahin sa cybersex operation aron makaantigo kini sa paghipos og kasayoran bahin sa illegal nga patigayon matud pa ni PRO-7 Chief Supt. Ager Ontog.

Si Ontog mipahibawo atol sa Talakayan sa Isyung Pulis (TSIP) forum kagahapon nga sa miaging gabii nakigkita siya sa mga sakop sa Australian Police ug mihangyo siya nga ipabansay ang iyang mga sakop bahin sa   cybersex crime.

Nagkanayon siya nga tungod sa bag-ong information technology nga gigamit   sa mga mapahimuslanong mga tawo ilabina na sa mga langyaw   daghang mga inosenteng batan-on ang mabiktima niini.

Giangkon ni Ontog nga ang PNP wala pay kahimanan sa pagsumpo sa cybersex operation dinhi sa Central Visayas ilabina sa Sugbo, apan iyang giklaro nga ilang paningkamotan nga molambo pa ang ilang kaalam kalabot niini.

Matud ni Ontog dili lang ang Sugbo maoy na-problema niining cybersex kundili lakip na ang ubang rehiyon, sama sa Metro Manila.

Matud niya nga ang ilang problema kaniadto mao ra ang prostitution apan gumikan sa modernong teknolohiya karon mihugpa na usab kining bag-ong matang sa krimen nga cybersex.

Si Ontog mitakdang makigkita kang Bise Gobernador Agnes Magpale aron hisgotan nila ang problema sa cybersex dinhi sa dakbayan ug sa kalungsoran sa Sugbo.

Samtang si Sr. Supt. Anthony Obenza, hepe sa Lapulapu City Police Office (LCPO)mibutyag nga tulo ka barangay sa dakbayan sa Lapulapu nga mao ang Buaya, Marigondon ug Basak ang ilang gimonitor karon bahin sa cybersex.

Gani sa niaging semana may gipatawag silang mga ginang nga pulos minyo gumikan kay nakig-chatmate kuno kini og mga langyaw ug ang nagtukmod kanila ila ra sab nga mga bana aron kini makakuwarta pinaagi sa cybersex.

Apan ang maong mga ginang pulos nanghimakak sa maong pasangil, matud pang Obenza.

Si Sr. Supt. Patrocinio Comendador, hepe sa Cebu Provincial Police Office (CPPO) miangkon nga posibleng miabot na ang maong problema sa ubang lugar sa probinsya.

Apan alang kaniya mas maayong buhaton mao ang pagpahigayon og pulong-pulong sa kabaranggayan aron mahibawo ang katawhan nga usa kini ka illegal nga matang sa kalihokan.

Si Sr. Supt. Melvin Ramon Buenafe, hepe sa Cebu City Police Office (CCPO) miangkon nga lisud nga mahibaw-an kadtong mga pribadong balay diin mismo ang tag-iya niini mao ra usab ang nalambigit sa cybersex. (BANAT NEWS)