Mga sikyu sa City Hall ilisan

CEBU, Philippines - Ipa-revoke ni Cebu City Mayor Michael Rama ang kontrata sa Care Best International Security Services nga maoy nagserbisyo sa pagbantay sa Cebu City Hall.

Sumala pa sa mayor nga wala na siya mahimuot sa performance sa maong security agency gumikan kay ang pagpanglungkab sa buhatan ni Konsehal Alvin Dizon sa miaging adlaw maoy ikatulong pagpanglungkab nga nahitabo karong tuiga. Unang nalungkaban makaduha ka higayon mao ang buhatan sa Cebu City Postal Office nga nahimutang sa unang andana sa legislative building.

Gipahibalo hinuon ni Cebu City Administrator Jose Marie Poblete nga maka-revoke ra ang siyudad og kontrata bisan unsang orasa sanglit aduna man sila’y igong rason niini.

Ang Care Best International Security Services mialagad sa City Hall sukad niadtong Enero ning tuiga diin midestino kini og 20 ka security personnel sa City Hall.

Gipasalig hinuon ni Poblete nga ilang ipaagi og tukmang proseso ang pag-revoke sa kontrata sa maong agency ug usa na niini ang paghatag kanila og higayon sa pagpasabot sa ilang habig. (BANAT NEWS)