International Seafarers Convention ipahigayon dinhi sa nasud

CEBU, Philippines - Ang Pilipinas maoy moalagad sa unang International Seafarers Family Convention nga ipahigayon didto sa Philippine International Convention Center sa   dakbayan sa Pasay, sa umaabot nga Agosto 4 ug 5, 2011, sumala ni Marissa F. Oca ang nag-organisa ning maong kalihokan.

Ang   duha ka adlaw nga kombensyon uban sa tema nga “ The Bonds of Families, the Success of the World” gitumong aron sa pagpalig-on sa   kadugtongan sa mga pamilya sa mga nanagtrabaho sa kadagatan nga nakatabang kaayo sa ekonomiya sa nasud.

Matud pa ni Oca nga kinahanglan ang tanang pamilya sa mga hingtungdang trabahante sa kadagatan sama sa opisyal o kaha tripulante sa barko ug uban pang matang sa panarbaho sa kadagatan dinhi sa nasud ug sa gawas giawhag nga motambong ning maong kalihokan.

Pipila sa mga dagkong butang nga hisgotan sa maong kombensyon mao ang mga isyu bahin sa paghatag og gahum sa kababayen-an, maritime piracy ug ang HIV/AIDS.

Pipila sa mga mamumulong sa maong kalihokan mao sila si Carla Limcaoco nga mamulong bahin sa Women in Maritime Philippines. Roy Paul sa ITF Seafarers Trust gikan sa United Kingdom ug ITF AIDS Advisor Dr. Asif Altaf nga gikan usab sa United Kingdom.

Gawas sa maong mga mamumulong   sila si Senador Pia Cayetano, chair sa committee on youth, women and family relations sa Senado nga mamulong labot sa “Youth and Freedom” ug si kanhi Kalihim sa Department of Transportation and Communications Arturo Valdez mamulong usab bahin sa “Life an Expidition”.  - BANAT NEWS