Lolo gipusil angol sa kontra

CEBU, Philippines - Kritikal ang kahimtang sa usa ka 63 anyos nga lolo human kini pusila sa iyang kontra kinsa mikulata usab sa   iyang anak nga babaye didto sa barangay Talavera siyudad sa Toledo sa miaging Lunes sa hapon.

Ang biktima mao si Apolonio Lopez, 63 , ug ang iyang anak nga nakulatahan mao si Hera Lopez, hingkod, nga molupyo sa nahisgutang lugar. Samtang ang suspek mao si Rammil Tapao Edoloberio, hingkod , minyo nga silingan sa mga biktima.

Si SPO3 Carmilito Hornales, desk officer sa Toledo City Police Station mibutyag sa Banat News nga ang biktima nakig-estorya sa mga drayber sa nag-parking nga habal-habal sa maong lugar dihang kalit nga miabot ang suspek kauban ang duha ka lalaki nga gihulagway nga nangita og away.

Ang suspek nga nagtangkil og armas de fuego nga .45 kalibre mideretso lang og pusil sa biktima sa walay igong hinungdan ug ang tulo ka bala miigo sa liog ug   nagkalainlaing bahin sa iyang lawas. 

Pagkahibawo ni Hera nga anak sa biktima midagan kini ngadto sa nahitaboan aron luwason ang iyang amahan dihang gisukmag siya sa suspek una mosibat pahilayo sa maong lugar. Si Hera kansang mata nasabak sa kumo maoy mihatod sa biktima uban sa mga drayber sa habal-habal ngadto sa Toledo City District Hospital apan gibalhin dayon kini sa South General Hospital sa siyudad sa Naga.

Samtang ang suspek nadakpan usab dayun atol sa hot pursuit operation sa kapolisan uban sa usa ka kauban niini nga si Cristopher Baclaan, 37, taga barangay Pardo sa dakbayan sa Sugbo.

Personal nga bangi ang hinungdan sa maong krimen sumala sa kapolisan.  - BANAT NEWS