Mayor Durano misumbalik pagpa-recall sa igsuon

CEBU, Philippines - Misumbalik pagsang-at og petition for recall ang mayor sa dakbayan sa Danao ug ang igsuon niining city administrator nga kanhi usab mayor batok sa ilang igsuong bise mayor ug siyam ka mga konsehal sa maong dakbayan.

Kagahapon sa hapon giubanan si Mayor Ramon ‘Boy’ Durano Jr., ug Jesus ‘Don’ Durano, City Administrator sa ilang abogado nga si Atty. Gloria Lastimosa Dalawampu ngadto sa buhatan sa Commission on Election (Comelec) dala ang 132 sets ka petition for recall nga gipirmahan sa 33 mil ka mga botante sa maong dakbayan.

Gibana-banang mokabat sa usa ka libo ka mga casual ug job order employees nga nagdala og mga placards ang nagpunsisok atubangan sa Comelec kagahapon sa hapon.

Si Mayor Durano Jr., sa pakighinabi sa mga sakop sa media nagkanayon nga ang rason sa ilang petition for recall batok sa kampo sa bise mayor nga si Ramon ‘Nito’ Durano III ug siyam niini ka mga konsehal mao ang makaluluoy karong kahimtang sa Danao.

Nangreklamo na ang mga casual ug job order employees tungod kay sulod sa pipila ka bulan na silang walay sweldo.

Ang mga konsehal nga gilakip sa buot ipa-recall ni Durano mao sila si Carmen Remedios Meca, Miguel Antonio Magpale, Jorge John Cane, Jose Thaddeus Roble, Cynthia Duterte, Alejandro Lwas, Marilou Camaongay-Flores, Roland Reyes ug Jovelina Enriquez. Wala maapil si Jesus Meca ang ikanapulo nga konsehal kay gikatahong nagmasakiton.

“Sa akong tan-aw padulong ni og dictatorial ug mawad-an na og demokrasya tungod sa iyang gibuhat ug kamanduan maoy iyang matuman,” paghulagway ni Mayor Durano ngadto sa iyang igsuong bise mayor nga si Ramon.

Sumala pa sa mayor nga iyaha kining gibuhat agi og pagsunod sa gitudlo sa ilang mga ginikanan sa pag-apil gyud sa kalihukan sa politika ug aron tabangan ang mga kabus.

Gitataw niya nga kining iyang gibuhat dili pakig-away ngadto sa iyang igsuon kondili alang sa kaayohan sa taga Danao. Unang misang-at og petition for recall ang bise mayor uban sa iyang mga konsehal batok sa mayor sayo niining bulana didto sa buhatan sa Comelec.

Giangkon sa mayor nga sa gibuhat sa bise mayor ug sa siyam ka mga konsehal naglisod gyud siya pagpatuman sa proyekto sa dakbayan tungod sa pagpugong sa 2011 annual budget.

Sa iyang bahin, si Gloria Lastimosa Dalawampu nga legal counsel sa mayor sa pakighinabi sa mga tigbalita nagkanayon nga wala silay nakitang komplikasyon niining pagsang-at sa kampo sa mayor og petition for recall batok sa bise mayor ug siyam ka mga konsehal.

Matud ni Dalawampu nga anaa diha ang komplikasyon kun ugaling modagan pagkamayor si Ramon ‘Nito’ sa umaabot nga recall election kay dili mahimong mo-resign sa pagkabise mayor si Ramon ‘Nito’ ug modagan siya pagkamayor unya sa recall election sanglit kalapasan kini sa Local Government Code.

Siya miingon nga kun madayon ang recall election kinahanglan modagan si Ramon ‘Nito’ sa pagkabise mayor unya ila kining pangitaan og kontra samtang mangita usab og kontra ang kampo sa bise mayor nga isangka batok sa mayor.

Si Atty. Lionel Marco Castillano ang provincial election supervisor kinsa miadto kagahapon sa Comelec-Danao nga nahinabi sa Banat News nagkanayon nga ilang paninguhaon nga mahuman og sayo ang pagsusi sa mga dokumento sa recall for petition sa mayor.

Matud ni Castillano posibleng madungan ang recall election sa mayor ug sa bise mayor ngadto na sa mga konsehal.

Giklaro ni Castillano nga moabot lang og 12,734 kon 20 percent sa kinatibuk-ang 63 mil ka botante sa Danao base sa natala nga records sa buhatan sa National Statistics Office (NSO) ang ilang basehan unya sa petition for recall.

 Nalipay si Castillano nga gipaagi na sa legal nga proseso ang gihimo sa mga lider sa dakbayan sa Danao ug nanghinaot siya nga kun unsa may resulta niini moagi usab sa legal nga proseso si kinsa ang makadaug unya sa recall election. (BANAT NEWS)