MANILA, Philippines - Samdan sa tiyan ang usa ka ulitawo human kini dunggaba sa iyang gikalalis nga iyang gisumbag ug gituok didto sa Sitio Awayan Poblacion-3 sa dakbayan sa Carcar niadtong Domingo sa kaadlawon.
Ang biktima mao si John Rammil Abarrintos, 20, ulitawo ug molupyo sa maong lugar samtang ang suspek mao ra ang iyang barkada ug silingan nga si Rommy Bacalan, hingkod. Si SPO1 Joel Pananganan sa Carcar Police Station mibutyag sa Banat News nga ang biktima ug suspek nag-inom og ilimnong makahubog sa wala pa ang hitabo.
Dihang nangalasbag na nagkalalis ang duha diin ang biktima nga init kaayo og ulo mikulata ug mituok sa suspek .
Ang suspek kinsa matud pa midiwalwal na ang dila ug hapit na kabugtoi sa gininhawa, milanit sa iyang kutsilyong dala ug gihansak sa walang kilid sa biktima.
Nasikop dayon sa kapolisan ang suspek samtang ang biktima gihatod usab dayon ngadto sa Carcar City District Hospital apan gibalhin kini sa Vicente Sotto Memorial Medical Center sa dakbayan sa Sugbo. - (BANAT NEWS)