CEBU, Philippines - Duha ka mga gidudahang drug pusher nasikop sa mga sakop sa Mandaue City Police Office (MCPO) atol sa buybust operation didto sa Barangay Basak dakbayan sa Mandaue sa milabay’ng gabii.
Ang nasikop mao si Lincy Ermac, hingkod, nga taga Sitio Agbati, barangay Cambaro ug Ramil Curbo, 25, ulitawo, nga taga Upper Labogon, nga pulos sakop sa maong dakbayan.
Matud ni P/Insp. Henric Bancolita sa MCPO nga dugay na nilang gipanid-an ang duha sa pagpamaligya niini og shabu hinungdan nga mihimo sila og buybust sa maong dapit.
Si Ermac nasakmitan og 9 ka gagmay’ng pakete sa gituhoang shabu ug P300 nga buybust money, samtang si Curbo nabawian usab og 4 ka gagmay’ng pakete sa gituhoan gihapong shabu.
Ang mga dinakpan nagtingkagol na sa prisohan samtang ang mga ebidensya giduso na ngadto sa PNP Crime laboratory. - (BANAT NEWS)