Mga kurakot gi-personal ni P.Noy

CEBU, Philippines - Taliwala sa pipila ka mga protesta malampuson sa paghatud sa iyang ikaduhang State of the Nation Address (SONA) si Presidente Benigno “NoyNoy” Aquino III kagahapon didto sa Kongreso.

Sama sa una niyang SONA, subling gibirahan ni PNoy ang mga kurakot nga opisyal gikan sa miaging administrasyon ug gibaharang taralon sila nga iyang gipangbansagang mga ‘wang-wang’ ngadto sa hukmanan.

“Ang mga dapat naglilingkod ang siya pang nang-aapi. Ang panlalamang matapos mangakong maglingkod- iyan po ang utak wang-wang,” matud pa ni Aquino.

Gimandoan usab niini ang bag-ong Ombudsman nga si kanhi Supreme Court Justice Conchita Carpio-Morales sa pagsigurong mataral sa hukmanan ang mga kawatan sa gobiyerno.

Giangkon niyang gi-personal gyud niya ang kampanya batok sa kurapsyon sa gobiyerno.

Giladlad ni Aquino ang datos sa pagkunhod sa statistics sa mga kabus nga nag-antos sa kagutom gikan sa 20.5% sa Marso ngadto sa 15.1% sa buwan sa Hunyo.

Kung sa natad sa ekonomiya gibutyag ni Aquino nga mikusog na ang stock market sa nasud nga moabot ug usahay molabaw na sa 4,000 index. Kapin sa 23 bilyones pesos na usab ang nadaginot gikan sa interest payments sa utang sa nasud, samtang gisaad sa presidente nga sa tuig 2014 aduna nay baratong kuryente sa nasud.

Gihangyo usab ni Aquino ang mga propesyonal ug mga self-employed nga magtinarong na og bayad sa ilang obligasyon sa buhis.

Lahi sa miaging administrasyon si Aquino mipahunong na sa pag-import og bugas tungod kay adunay katakos ang atong mga mag-uuma sa pag-suplay niini.

Gihatagan usab og pagtagad ni Aquino ang kahimtang sa mga kapolisan ug militar pinaagi sa housing program ingon man ang modernisasyon sa militar.

“Parating na ang mga capability upgrade at modernization ng kagamitan ng Sandatahang Lakas. Literal na pong naglalakbay sa karagatan papunta rito ang kauna-unahan nating Hamilton Class Cutter, isang mas modernong barko na magagamit natin para mabantayan ang ating mga baybayin,” sigun pa ni Aquino. - (BANAT NEWS)