4 gun for hires gitutukan sa MCPO

CEBU, Philippines - Upat ka mga hired killers ang gisundan sa Task Force Ouano nunot sa pagbanhig patay sa magpapatigayong si Antonio Ouano sa North Reclamation Area sa dakbayan sa Mandaue sa milabay’ng semana.

Sa gipahigayong imbestigasyon sa kapolisan upat ka mga iladong hired killers ang ilang gisusi kung aduna ba kini kalabutan sa pagbanhig patay ni Ouano.

Si Insp. Ramil Morfus sa Investigation and Detective Management Branch nagkanayon nga ilaha pang gikumpirmar kung duna silay mga pending warrants of arrest. Ang gituhuang mga hired killers gikan sa norte nga bahin sa lalawigan sa Sugbu ug nasigpatan sa dakbayan sa Mandaue atol sa maong insidente hinungdan nga mao kini ang ilang gisundan.

Nagduda ang kapolisan nga dako ang kasuko sa responsable sa maong krimen hinungdan nga kini mikuha og serbisyo sa usa ka hired killer aron sa pagpatay ni Ouano.

Samtang laing testigo ang ilang giimbitar aron makahatag og impormasyon kalabot sa maong hitabo ug sa paghulagway niini pinaagi sa cartographic sketch.

Matud pa ni Morfus base sa paghulagway sa maong saksi sa mamumuno nagpangidaron kini og 25 – 30-anyos, 5’2”- 5’4” ang gitas-on, kasarangan ang barog, kasarangan ang pamanit lawom og mata ug flat top og buhok.

Ila usab nga gitutukan ang mga anggulo sa negosyo nga diin adunay mga na-pending mga petisyon diha sa korte ug sa uban pang mga pending nga kaso sama sa isyu sa yuta diha sa korte nga naglambigit gihapon sa biktima. (EIM) - (BANAT NEWS)