CEBU, Philippines - Malinawon ra ang lungsod sa Compostela nga nagsaulog sa ilang piyesta kagahapon bisan walay mayor, bise mayor ug mga konsehales nga nagdumala sa maong lugar.
Si Sr. Insp. Allan Rosario, hepe sa kapolisan sa maong lungsod nga nahinabi sa Banat News miingon nga higpit nilang gibantayan ang matag adlaw ug gabii nga kalihokan sa tuyo nga kapugngan ang mga dautang elemento nga mopahimulos sa kahigayonan.
Matud pa niya nga dako kaayo og gikatampo ang mga polis nga sakop sa Regional Mobile Group (RMG) 7 ug sa Special Reaction Unit (SRU) nga gipadala sa Cebu Provincial Police Office (CPPO) isip dugang puwersa sa kapolisan sa lungsod nga nagbantay sa kahusay ug kalinaw sa maong lugar atol sa tinuig nga kasaulogan sa piyesta niini.
Si Sr. Insp. Rosario nagkanayon nga bisan sa nagdasok nga mga tawo nga mikuyog sa pasunding wala sila makadawat og mga taho nga adunay biktima sa pagpanguot, pagpanglabni, pagpanulis ug uban pa.
Ang parade nga gipahigayon kagahapon sa hapon sa bispiras sa tinuig nga pangilin gisalmotan sa mga kawani sa kagamhanan, mga barangay opisyal, pribado nga kahugpongan.
Lakip usab nga mikuyog sa maong parade mao ang taga Department of Education nga naglakip sa mga magtutudlo, mga tinun-an, Non-Government Organization, (NGO) Department of Interior and Local Government (DILG) 7 nga gipangulohan ni Director Pedro Noval kinsa mao usab ang officer-in-charge sa maong lungsod ug uban pa. - BANAT NEWS