Mipatay sa Hapon nailhan

CEBU, Philippines - Nailhan na sa kapolisan ang mipatay ug mitulis sa usa ka Japanese national sa BF Subdivision sa barangay Agus, dakbayan sa Lapulapu sa miaging adlaw.

Apan sa pagkakaron gipugngan kini sa kapolisan nga dili una ipagawas sa mga balita samtang gihikay na ang warrant of arrest alang kaniya, matud pa ni PO2 Carlos Barluado sa homicide section sa kapolisan sa maong dakbayan sa follow up nga gihimo sa Banat News kagahapon.

Matud pa ni PO2 Barluado nga kinahanglang madakpan una kini pinaagi sa orden de aresto una nila ibutyag ang ngalan ngadto sa taga media aron dili mabaraw ang ilang misyon sa pagsikop sa suspetsado.

Si Uki Taka-o, 76, usa ka Japanese national nga nagpuyo sa BF Subdivision sa dakbayan sa Lapulapu sukad pa niadtong Marso niining tuiga napalgan nga patay sa sulod sa lawak sa giabangan niining balay sa maong dapit.

Gituohan sa mga imbestigador sa homicide section sa kapolisan sa maong dakbayan nga gibunalan ang agtang sa biktima base sa samad niini.

Ang tiyorya sa kapolisan nagbutyag nga human makuyapi gumikan sa bunal sa iyang agtang, gibitik ang liog niini og electric wire ug dihang natuok nakabsan sa gininhawa ang biktima. Si Sr. Supt. Anthony Obenza, direktor sa Lapulapu City Office miingon nga nahanaw ang ATM card sa biktima ug gituohang gisakiyo sa suspetsado.

Dugang pa ni Obenza nga ilang gituohan nga gipatug-an ang biktima sa PIN number sa iyang ATM ug dihang nagdumili kini, gituok ang iyang liog sa kuryente.  - BANAT NEWS