Ecozone tukoron sa siyudad sa Lapulapu

CEBU, Philippines - Gipirmahan ni Lapulapu City Mayor Paz Radaza ug mga opisyal sa MacroAsia Properties Development Corporation (MPDC) ang usa ka Memorandum of Understanding(MOA) alang sa katukoran sa 5 hectaryang Economic Zone sulod sa Mactan Cebu Iinternational Airport (MCIA).

Sa bahin sa MPDC ang mipirma sa MOA mao si Joseph Chua, chairman sa maong kompaniya, ug ang presidente niini nga si Chris Tiu uban ni Lapulapu City Vice Mayor Marcial Ycong.

Si Chua nagkanayon nga usa kini ka dakong oportunidad alang sa mga Oponganon nga walay trabaho kay pinaagi sa mga magpapatigayong langyaw nga ilang paabangon sa maong Ecozone, makatrabaho ang mga walay trabaho sa maong lugar.

Sa laing bahin si Bernhard-Krueger Sprengel ang Presidente sa Lufthansa (usa ka airline maintenance company nga nagbase sa Germany) mipasalig nga mopalapad sa ilang operasyon sa MCIA aron ang tanang abyon sa tibuok kalibotan anha na magpaayo sa ilang gubaong eroplano sa Lapulapu.

Unya ang mga estudyante sa pagka-abyador sa aviation school sa Lapulapu dako kaayo og higayong makatrabaho sa maong kompaniya.

Samtang si Dr. Nonadel Alvarado Soriano ang Campus Director sa Philippine State College of Aeronautics (PHILSCA) nga nahimutang sulod sa Mactan Benito Ebuen Air Base nalipay sa maong kalamboan gumikan kay ang mga tinun-an sa PHILSCA anaa man mag- On the Job Training (OJT) sa Lufthansa, ug kun mapalapdan labi pang daghang mga estudyante ang maka-OJT sa maong kompaniya.

Samtang si Mayor Radaza sa iyang bahin nalipay sa pagpili sa tagdumala sa Lufthansa ug sa MPDC nga tukoran og Ecozone ang Lapulapu.

Gilakip usab sa maong MOA ang bayranan sa MPDC sa ilang buhis ngadto sa dakbayan sa Lapulapu.  - BANAT NEWS