Tiguwang napunggit sa motor patay

CEBU, Philippines - Patay ang usa ka senior citizen human mabangga sa usa ka motorsiklo niadtong Sabado sa gabii diha sa national highway sa sitio Bulobugan, barangay Tahaw, lungsod sa Pinamungahan.

Ang biktima mao si Carlito Salado, 65, residente sa maong lungsod kinsa wala na makaabot nga buhi sa Pinamungajan District Hospital.

Ang suspetsadong nakabangga kang Salado mao si Rodel Jaime, 28, taga sitio Mabini, sa nahisgutang barangay ug drayber sa itom nga Suzuki 125 nga motorsiklo nga nagtangag sa plakang 3628-TU.

Base sa imbestigasyon sa kapolisan, si Jaime nagbiyahe gikan sa dakbayan sa Toledo paingon sa lungsod sa Pinamungajan dihang si Salado kalit mitabok sa karsada hinungdan nga nabanggaan kini.

Ang biktima nakaangkon og grabeng kadaot sa iyang lawas tungod sa pagkabunal diha sa karsada nga hinungdan sa iyang kamatayon.

Si Jaime kinsa boluntaryong mitahan sa kapolisan human sa hitabo, kasong reckless imprudence resulting to homicide ang gikatakdang ipasaka batok kaniya karong adlawa diha sa Naga City Prosecutor’s Office.  - BANAT NEWS