CEBU, Philippines - Human sa mga report nga nabati nga si Bella Ruby Santos giingong anha mosurender sa mga awtoridad sa dakbayan sa Naga ang mayor sa siyudad nga si Valdemar Chiong nagkanayon nga naghuwat lang siya kung motawag kaniya ang suspetsado sa pagdagit ug pagpatay sa 6-anyos nga si Ellah Joy Pique.
Si Chiong nga nahinabi sa Banat News nagkanayon nga gihuwat lang niya kung dunay motawag nga mga paryente ni Santos o mismo ang suspetsado kung kini buot nga motahan.
Matud ni Chiong nga gisusi na niya ang Bureau of Jail Management and Penology (BJMP) sa ilang siyudad ug nasuta niya nga aduna sila’y pasilidad alang sa seguridad ni Santos.
Hinuon matud usab ni Chiong nga ang korte na ang mohukom kung asa ibutang si Santos.
Kahinumduman nga lakip na ang mga paryente ni Santos nanawagan nga mosurender na kini aron masugdan na ang pagdungog sa iyang kaso ug aron usab mawagtang na ang ilang kabalaka sa kahimtang niini.
Ang hepe sa kapolisan sa Naga nga si Chief Inspector Timmar Jamio Alam nagkanayon nga bukas sila kung si Santos anha mosurender sa ilang buhatan.
Niadtong Lunes ang kapolisan sa Naga miadto sa balay ni Santos aron ihatud ang warrant of arrest sa suspetsado apan wala kini ngadto. (BANAT NEWS)