Laing subdibisyon gireklamong nakaingon sa baha

CEBU, Philippines - Mitiyabaw na ang mga molupyo sa Gallardo’s block ug Verano-11, sa sitio Banawa sa barangay Guadalupe tungod sa grabeng pagbaha nga ilang nasinati sa nanglabay’ng pagbunok sa uwan.

Usa ka subdivision na usab ang ilang gipasanginlang maoy nakaingon sa grabing pagbaha sa ilang lugar nga miabot taga tuhod ang baha sa maong lugar.

Gitumbok sa mga residente ang usa ka subdivision nga nahimutang sa ibabaw nga bahin sa maong lugar nga giingong didto maggikan ang baha nga mosubay sa karsada.

Ang nagpakabanang molupyo sa Gallardos block nga si Ricardo Navaja mikwestyon nganong na-aprobahan ang maong subdivision nga wala may klarung drainage system niini.

“Ang akong pangutana diha nganong naaprobahan man na nga wala man diay nay klarung drainage siyaro naman pud ang mga opisyal sa siyudad dili mohimo aksyon ani,” dugang ni Navaja.

Nasayran nga atol sa pagbunok sa kusog nga uwan niadtong Miyerkules sa hapon daghang kabalayan ang nasudlan og tubig.

Hinoon gibutyag ni Guadalupe barangay captain Michael Gacasan nga iyang ipasusi ang maong subdivision aron mapangitaan og sulbad ang suliran.

Bisan si Kapitan Gacasan nasurpresa kun nganong na-aprobahan ang katukoran sa maong subdivision nga walay klarong drainage plan. (BANAT NEWS)